मुंबईत गुलाबराव, दिल्लीत गिरीश! जळगाव विधान परिषदेसाठी महायुतीत ‘पॉवर गेम’ पेटला

“जळगाव विधान परिषद जागेवरून महायुतीत चुरस वाढली; उमेदवारीच्या हालचालींमुळे राजकीय चर्चांना उधाण”

जळगाव | प्रतिनिधी

जळगाव जिल्ह्यातील स्थानिक स्वराज्य संस्था मतदारसंघाच्या विधान परिषद निवडणुकीच्या पार्श्वभूमीवर महायुतीमधील राजकीय घडामोडींना वेग आला असून, उमेदवारीवरून भाजप आणि शिवसेना (शिंदे गट) यांच्यातील अंतर्गत स्पर्धा आता उघडपणे चर्चेत येऊ लागली आहे. जळगाव विधान परिषद मतदारसंघावर दावा सांगताना दोन्ही पक्षांकडून जोरदार हालचाली सुरू असल्याने महायुतीत ‘पॉवर गेम’ रंगत असल्याचे चित्र समोर येत आहे.

राजकीय वर्तुळात विशेष चर्चा रंगण्यामागचे कारण म्हणजे पालकमंत्री गुलाबराव पाटील यांच्या मुंबई दौऱ्याची चर्चा आणि त्यावर भाजपचे वरिष्ठ नेते तथा मंत्री गिरीश महाजन यांनी दिलेली प्रतिक्रिया. जळगाव विधान परिषद निवडणुकीत उमेदवारीच्या संदर्भात राजकीय हालचाली वाढल्या असल्याच्या पार्श्वभूमीवर गुलाबराव पाटील तातडीने मुंबईला रवाना झाल्याची चर्चा सुरू झाली. त्यानंतर मंत्री गिरीश महाजन यांनी माध्यमांशी संवाद साधताना केलेल्या वक्तव्यामुळे या राजकीय समीकरणांना आणखी वेग आला.

गिरीश महाजन यांनी मिश्किल शैलीत प्रतिक्रिया देताना म्हटले की, “गुलाबराव पाटील मुंबईला गेले आहेत. उमेदवारीसंदर्भात पक्षश्रेष्ठींशी चर्चा करण्यासाठी ते जात असल्याचे कळते. मात्र मी देखील दिल्लीला जात आहे. मी धनगर समाजाच्या आरक्षणाच्या विषयावर दिल्लीला जात आहे. उपमुख्यमंत्री एकनाथ शिंदे दिल्लीत आहेत म्हणून मी दिल्लीला जात नाही.”

या वक्तव्यानंतर राजकीय वर्तुळात विविध चर्चांना उधाण आले आहे. महायुतीतील दोन महत्त्वाच्या नेत्यांमधील अप्रत्यक्ष टोलेबाजीची चर्चा जिल्ह्याच्या राजकारणात रंगू लागली असून, विधान परिषद निवडणुकीपूर्वीच वातावरण तापू लागल्याचे चित्र आहे.

दरम्यान, जळगाव विधान परिषद मतदारसंघावर भाजपने आपला दावा स्पष्टपणे कायम ठेवला आहे. मंत्री गिरीश महाजन यांनी याबाबत भूमिका मांडताना सांगितले की, गेल्या अनेक वर्षांपासून ही जागा भाजपकडे राहिली आहे आणि भाजपने सातत्याने या मतदारसंघात विजय मिळवला आहे. त्यामुळे परंपरेनुसार ही जागा भाजपलाच मिळावी, अशी पक्षाची भूमिका असल्याचे त्यांनी स्पष्ट केले.

“गेल्या २५ ते ३० वर्षांपासून आम्ही ही निवडणूक लढवत आलो आहोत. भाजपने सातत्याने या जागेवर विजय मिळवला आहे. त्यामुळे या वेळीही ही जागा भाजपकडेच राहावी, यासाठी आम्ही आग्रही आहोत,” असे महाजन यांनी स्पष्ट शब्दांत सांगितले.

दुसरीकडे, शिवसेना (शिंदे गट) देखील या जागेसाठी सक्रिय झाल्याचे दिसत आहे. उमेदवारीच्या हालचाली, वरिष्ठ पातळीवरील भेटीगाठी आणि राजकीय रणनीती यामुळे महायुतीमधील अंतर्गत समीकरणांकडे आता जिल्ह्यासह राज्याचे लक्ष लागले आहे.

जळगाव विधान परिषद निवडणुकीच्या निमित्ताने महायुतीतील समन्वय, जागावाटप आणि स्थानिक राजकीय ताकद यांची मोठी परीक्षा पाहायला मिळणार असल्याची चर्चा सुरू आहे. आगामी काही दिवसांत पक्षश्रेष्ठी कोणता निर्णय घेतात आणि उमेदवारीचा तिढा कसा सुटतो, याकडे राजकीय वर्तुळाचे लक्ष लागले आहे.

— सूक्ष्मलोक NEWS